Sían

2007-08-04T19:01:00.001Z

Rolling Stones á morgun!!!

2007-07-26T16:56:00.000Z

Það sem á daga mína hefur drifið síðan síðast:

- Ég fór á fótboltaleik, Aarhus á móti Horsens þar sem Horsensmenn unnu.

Soldið mikið fólk

- Fór til Odense á föstudagsmorguninn og var fram á laugardagskvöld. Þar skoðuðum við Marta og mamma hennar H.C. Andersen safnið og svo fórum við Marta að versla en ekki hvað hehe;) Um kvöldið fórum við út að borða og fengum okkur í aðra tánna:) Daginn eftir fórum við Marta í stóra kringlu þar sem Marta verslaði af sér rassgatið en ég var aðeins hógværari enda búin að vera fastur gestur á Strikinu í næstum því 3 vikur:) Hlupum svo nánast í Magasin því við héldum að það væri að fara að loka en svo var ekki og versluðum við þar ógeðslega flott pennaveski í Friis og Company. Þetta var frábær ferð og held ég bara það skemmtilegasta sem ég hef gert hérna í Danaveldi fram að þessu:) Ég var ekki með myndavélina á föstudeginum og á eftir að fá myndir hjá Mörtu en ég tók þessar á laugardeginum.

H.C. Andersen

Skreyting í glugganum á H.C. Andersen safninu.

Svo maður viti hvert maður eigi að fara.

- Við Amanda erum búnar að vera frekar duglegar að fara á kaffihús.

- Hitti Hugborgu á þriðjudaginn og við kíktum í búðir (hef gert voða lítið af því hehe) og á kaffihús.

- Svo kemur familían mín annað kvöld og verður frábært að hitta liðið:) Verðum með bílaleigubíl í 3 daga og ætlum að fara eitthvað skemmtó. Svo förum við saman yfir til Köben áður en kemur að heimferð og ætlum að fara á Rolling Stones svo eitthvað sé nefnt og er spennan að magnast yfir því:)

2007-07-16T20:50:00.000Z

Hér eru myndir frá síðustu dögum.

Fórum í grillveislu til mömmu vinar Amöndu sem býr í rosasætu húsi í úthverfi Aarhus og er 200 metrum frá ströndinni. Maturinn var æðislegur og þetta var yndislegt kvöld þar sem spjallað var um allt milli himins og jarðar.

Flotta húsið

Við matarborðið

Við Amanda við ströndina

Svo er Jazzfest hér í Aarhus og verður í viku og við skelltum okkur á tvenna tónleika í gær og það var mjög skemmtilegt. Fyrri hljómsveitin leit út eins og Hjálmarnir en hljómaði svolítið eins og Paparnir og einhver þungarokkshljómsveit saman, ég veit furðuleg blanda. Tónleikarnir um kvöldið voru frábærir og spilaði hljómsveitin Prima Junior hressa tónlist frá 20's og 30's og voru með ótrúlega flott show.

Hljómsveitin Afenginn, söngvarinn er með svaka dreada og var á táslunum.

Þessir voru allir í búningum, teinóttum jakkafötum í mismunandi litum.

Vorum síðan á ströndinni í gær og í dag og það var sko ljúft. Grilluðum svo áðan í garðinum, namm namm.

Er svo að fara til Odense á föstudaginn að hitta Mörtu og ég hlakka ekkert smá til:)

Heyrðu svo var ég víst klukkuð af henni Lindu og það er nú eins gott að standa sig í því;) Þar á maður að segja 8 merkilegar staðreyndir um sig og hér kemur það:

1. Ég er líkt og Linda afar skipulögð (samt ekki alveg eins skipulögð og hún, er líklega mjög óskipulögð borin saman við hana hehe) ég t.d. skrifaði niður á blað þessar 8 staðreyndir um mig áður en ég setti þær hér inn. Það er kannski ekki skrítið að ég sé kennari, enda er bráðnauðsynlegt að vera vel skipulagður í því starfi.

2. Ég er svolítill frestari og geri mikið af því að fresta hlutum sem ég nenni ekki að gera þó svo að það taki mjög lítinn tíma að framkvæma þá og að maður verði ánægður þegar þeim er lokið. Er alltaf að breyta reminder-unum á símanum mínum.

3. Barnlausa manneskjan ég get alveg misst mig í barnafatabúðum, eftir að frændur mínir komu í heiminn og líka eftir að Ágústa Rut fæddist. Þá fæ ég slæmt kast af valkvíða og snýst í milljón hringi áður en ég kaupi eitthvað því allt er svo flott. Hvernig ætli ég verði þegar ég eignast börn sjálf, hehe.

4. Er svolítil Já manneskja og á erfitt með að segja nei þó svo að mig langi ekkert meira en að gera einmitt það. Ég er þó að lagast í þessu sem betur fer.

5. Ég er kennari (vá hvað það er gaman að segja/skrifa þetta).

6. Verð helst að vera að gera margt í einu, enda er ég í tvíburamerkinu. Þarf t.d. helst að skoða nokkrar heimasíður í einu og ef ég er að horfa á semi spennandi þátt í sjónvarpinu verð ég að hafa tölvu eða tímarit hjá mér. Kannski er ég bara með snert af athyglisbresti hehe.

7. Er ekki hávaxin (ok ég er lágvaxin) en á varla neina háhælaða skó og tek því þægindin fram yfir útsýnið.

8. Elska tónlist og veit ekki hvernig heimurinn væri án hennar.

2007-07-11T20:12:00.000Z

Hver sagði að það væri séríslenskt hvað veðrið væri breytilegt, á nokkrum dögum hef ég séð allt nema snjó held ég bara. Í gær var sól og hiti svo kom úrhelli og svo sýndi sólin sig aftur og þannig hélt það áfram.

Það var æðislegt að fá Margréti í heimsókn um helgina:) Við stelpurnar kíktum á nokkra staði hér á laugardagskvöldið og fengum okkur kokteila. Daginn eftir fórum við í Magasin (eina búðin sem var opin) og niður á höfn þar sem hátíð og mér leið eins og það væri kominn 17. júní. Krakkar með kandíflos, sölutjöld, fullt af fólki, hljómsveit og tívolí. Það var mjög skemmtilegt að upplifa danska hátíðarstemmningu.

Um helgina heyrði ég mjög skemmtilega fullyrðingu um mig sem ég hef held ég ekki heyrt síðan ég var lítil en hún hljómar á þessa leið: "Vá Sía hvað þú ert brún, þú ert brúnni en ég." Þetta var Margrét sem hefur ekki séð sólina síðan í vor og ég var náttúrulega í sumarveðrinu heima:) Þetta gladdi mig mjög mikið hehe.

Á mánudaginn kom svo loksins sumarveður og við Amanda borðuðum kjúklingasalat út í garði. Þetta var stutt heimsókn hjá Fröken Sumri og hún hélt eitthvert langt í burtu í gær og leyfði Herra Rigningu að koma í staðinn, skil ekki hvers vegna.

Stór dagur á morgun, elsku besta mamma mín á afmæli og líka Amanda og Kata:)

Við Amanda á laugardagskvöldið

Við Margrét, gott ef ég hef ekki hækkað eitthvað síðan við hittumst síðast:)

Nei greinilega ekki, það er samt ekki svona mikill hæðarmunur, hún stóð á tá:)

Paradis is, ótrúlega góður ís:)

Mega hress hljómsveit sem tók fullt af gömlum góðum smellum og kom fólki í gírinn

Ótrúlega flott skip

Kvöldmatur í garðinum

Amanda með Kötulegan svip:)

2007-07-07T15:08:00.000Z

Fór í Ikea í gær með Amöndu og keypti mér fótakrem, já þið lásuð rétt það er hægt að kaupa fótakrem, sturtusápu og body lotion í Ikea í Aarhus eins undarlegt og það hljómar í húsgagna- og húsbúnaðarverslun hehe.

Hef svo bara setið við gluggann í dag og beðið eftir sólinni, nei djók kíkti í bæinn og verslaði mér einn bol og svo keypti kennarinn sér ógó sæta marimekko stílabók til að skrifa í kennsluhugmyndir. Er enn ekki komin í verslunargírinn sem ég fer í þegar ég er komin út fyrir íslenska landhelgi og ég hugsa að ástæðan sé sú að ég hef svo góðan tíma, ég verð komin á 90 km hraða á strikinu síðustu dagana.

Margrét er núna í lestinni á leiðinni til mín, það verður svo mikil snilld að hitta hana. Er með hvítt og bjór í kælinum sem bíður þess að vera drukkið í kvöld:)

Lýk þessu í dag með mynd af húsinu "mínu"

Herbergið sem ég er í er á þriðju hæðinni

2007-07-05T18:48:00.000Z

Bréf nr. 1 frá Danmörku:)

Kom hingað á þriðjudagsmorgun og mér til mikillar undrunar og ánægju skein sólin hér í Árósum (þó ekki eins mikið og heima). Ferðin gekk glimrandi vel en ég var ansi þreytt þennan fyrsta dag þar sem ég svaf ekkert í vélinni (dottaði aðeins) og heldur ekkert í lestinni (þorði ekki að líta af farangrinum hehe) og vakti þannig í rúman sólarhring. Það var æðislegt að hitta Amöndu eftir langan tíma og við erum búnar að bralla ýmislegt hér síðan ég kom t.d. kíktum við í búðir í bænum, erum búnar að elda saman og fara út að borða og svo erum við einstaklega öflugar að hjóla:) Herbergið sem ég mun búa í á meðan á dvölinni hér stendur er mega kósý og það er rosa gott að vera hérna. Svo á laugardaginn kemur Margrét mín til mín og þá verður sko gaman:)

Ég var að spá í að vera dugleg að setja inn myndir og ef til vill nokkur orð með hér næstu vikurnar svo þið getið lesið og líka er þetta svona dálítil dagbók fyrir mig:) Verið bara dugleg að kommenta:)

Hey ég var þarna fyrir 9 árum!

Amanda og kjúklingarétturinn sem við elduðum

Ég og maturinn sem var eldaður í gærkvöldi

2007-05-02T22:02:00.000Z

Hamingjuóskir til allra sem eru búnir að skila lokaverkefnum:)

Er upp í skóla að læra með Örnu Ósk. Var að átta mig á því að þegar ég er búin með þetta verkefni sem ég er að gera núna þá þarf ég ekki að gera neitt verkefni fyrr en ég fer í mastersnám, jibbý jey:)

Annars er kokteilboð með kennurunum á föstudaginn í tilefni af lokaverkefnaskilum og ég hlakka ógó mikið til:) Við stelpurnar erum með smá planað og mun ég segja nánar frá því eftir föstudaginn hehe:)

2007-04-18T15:01:00.000Z

Eins og glöggir lesendur tóku eftir þá er ég að fara að kenna í Laugarnesskóla (fann bara ekki aðra mynd hehe). Marta og Gugga fara að kenna þar líka þannig að þið getið rétt ímyndað ykkur hvernig kaffi- og matartímarnir verða:)

Er farin að verða ansi spennt fyrir Marmaris, get varla beðið eftir því að fara:)

Hafið það annars gott síðasta dag vetrar, sjáumst eftir veturinn hehe

2007-04-13T19:31:00.000Z

Verð kennari í þessum skóla næsta skólaár:)

2007-03-17T13:00:00.000Z

Rakst á þessa lýsingu á fasteignavef Morgunblaðsins: Mjög góð og björt 57,0 fm 3ja herbergja íbúð á 1. hæð ofan kjallara í 3 íbúða húsi á frábærum og rólegum stað.

2007-03-14T17:03:00.000Z

Fékk mér að borða á Maður lifandi í hádeginu í dag með Kötu og Amöndu. Mjög góður matur og fínn staður. Það er bara eitt sem er skrítið þarna og það er að sjá bakka með grasi á borðinu sem fólk drekkur eftir að það er búið að hakka það niður í safa!

2007-03-10T19:42:00.000Z

Fór í gær á skemmtilegustu árshátíð sem ég hef farið á:) Kvöldið byrjaði klukkan fimm um daginn þegar við Arna mættum fashionably late í fyrirpartýið hjá Bjarney. Þar borðuðum við snarl, sögðum hver leynivinurinn okkar væri og rifjuðum upp síðustu þrjú ár (og skrifuðum í bókina hennar Láru). Rútan sem við geishurnar unnum sótti okkur og vorum við komnar í Gullhamra um hálf átta. Við tókum lagið fyrir utan og héldum síðan inn til að finna bleiku beiba borðið sem var að sjálfsögðu besta borðið, beint fyrir framan sviðið. Maturinn var frábær, skemmtiatriðin líka og Buffarar stóðu sig einstaklega vel á ballinu. Satt best að segja hefði kvöldið varla getað verið betra:)

2007-03-07T10:12:00.000Z

Í gærkvöldi fæddist mjög svo stundvís lítil stúlka:) Elsku Linda og Andri innilega til hamingju með krúsídúlluna, hlakka mikið til að hitta hana.

2007-03-05T10:54:00.000Z

Í dag hefjast tvær vikur, árshátíðarvikan og leynivinavikan. Er búin að vera að pæla í því síðustu daga hvað maður eigi að gera fyrir leynivininn og ég er með slatta af hugmyndum sem ég náttúrulega má ekki segja hér hehe:) Gaman að þessu.

2007-03-02T17:06:00.000Z

Við (ég, Arna, Lára og Eyrún) komum, sáum og sigruðum búningakeppnina á keilukvöldinu í gærkvöldi. Í verðlaun var rútuferð úr partýinu á árshátíðina næstu helgi og út að borða á Quizno's:) Staðsetning partýsins 9. mars var snarlega færð úr Grafarvoginum vestur í bæ til að njóta vinningsins til fulls hehe;) Bjarney, Þórunn, Ósk og Erna urðu í 3.-4. sæti þannig að bleikubeibin tóku 2 af 4 vinningssætum sem er algjör mega snilld. Hér eru nokkrar myndir frá kvöldinu.

Við geishurnar, erum við ekki flottar:)

FBI agents (Elísa undercover)

Los Clikkos, vá hvað þær eru eins og persónur úr teiknimynd:)

Arna stóð sig með prýðum í keilunni:)

Erna að segja "sís"

Þessir alríkislögreglumenn hugsuðu svo stíft að það fór að rjúka úr þeim.

Ein japönsk og önnur einhvers staðar frá:)

Ein góð pósa í lokin.

2007-03-01T19:53:00.000Z

Í kvöld er það...

Berlín í máli og myndum

2007-02-14T22:24:00.000Z

Mynd 1: East Side Gallery sem er sem sagt á leifum múrsins.
Mynd 2: Mynd sem á að tákna stríð í Ísrael og Þýskalandi.
Mynd 3: Trabant á leið í gegnum múrinn.
Mynd 4: Flott heimsklukka á Alexander Platz, takið eftir Reykjavík.
Mynd 5: Ég milli lappanna á Karli Marx.
Mynd 6: Við Margrét á Karaókí bar þar sem við sungum ekki heldur spiluðum pool og drukkum kokteil.
Mynd 7: Kirkja á Ku Damm sem var mikið sprengd.
Mynd 8: What up!
Mynd 9: Hænsn í litlum húsdýragarði við götuna hennar Margrétar.
Mynd 10: Brandenborgarhliðið.

Kíkið líka á Margréti þar eru fleiri myndir.

2007-02-05T23:15:00.000Z

Þá er ég komin til Berlínar, ferðin gekk vel þrátt fyrir að ég hafi villst í komusalinn á Leifsstöð enda búið að breyta öllu þar, en það er bara fjör hehe:)
Fór á alveg brillíant indverskan veitingastað áðan með Margréti sem heitir Amrit. Fékk þar besta indverska mat ever. Sitjum núna með weißbier við hönd og erum að fara að spila mau mau. Svo verður tekinn beautysleep fyrir verslunardag á morgun;)

2007-02-04T12:42:00.000Z

Ég er að fara á morgun til Berlínar!!!! Er byrjuð að pakka og gera allt klárt. Ég fer upp á völl í hádeginu (eftir minna en sólarhring). Vááá hvað ég hlakka til:)

2007-01-25T22:20:00.000Z

Eftir hringavitleysu er loksins búið að panta, ég er á leið til MARMARIS eftir nákvæmlega 4 mánuði eða þann 25. maí. Vááá hvað ég hlakka til:D Nú get ég farið að hugsa um Tyrkland, sólskin, markaði og allt það sem er í boði. Ég verð í tvær vikur þannig að ég mun fagna 25 ára afmælinu mínu í góðra vina hópi og þá verður sko skandalast hehe:) Verð á þessu hóteli fyrstu vikuna sem er ógó flott.

Annars styttist í fyrstu utanlandsferðina á árinu, aðeins 11 dagar í Berlín:)

Frumflutti síðan lag um Freyju í Þjóðsögum, goðsögum og ævintýrum, vildi að ég gæti sett það hér á síðuna og leyft öllum að njóta.

Á morgun er bingó og þá er markmiðið að vinna alla flottustu vinningana og detta svo í það hehe;) Er sko í bingónefnd og þetta verður það flottasta ever.

2007-01-19T13:41:00.000Z

Þá er fyrsta vikan í skólanum búin, held ég hafi aldrei verið að læra jafn mikið í fyrstu vikunni og núna. Að vísu hefur þetta mest verið undirbúningur fyrir fullt af verkefnum t.d. heimildavinna og svoleiðis. Ég er í einu námskeiði á yngri barna kjörsviðinum og svo tveimur á íslensku og auðvitað er ég líka að gera lokaverkefni. Mér líst bara mjög vel á þetta allt saman, þetta ætla að verða nokkuð spennandi námskeið:)

Fór einmitt með íslensku kjörsviðinu á leikritið Bakkynjur í Þjóðleikhúsinu í gær. Fyrst var mjög fínn fyrirlestur með Hlín Agnarsdóttur um leikritið. Leikritið var bara nokkuð gott en aðeins of langt, um tveir og hálfur tími. En með því að mæta kláruðum við 10% af námskeiðinu sem er ótrúlega gott eftir bara eina viku í skólanum:)

Það fór fram kosning í gær um hvert við ættum að fara í útskriftarferð og eins og staðan er núna þá verður farið til Rhodos, endanleg ákvörðun verður tekin eftir helgi.

Helgin verður bara róleg og góð. Fer í saumó annað kvöld og svo ætla ég að læra og slappa af. Vona að þið eigið góða helgi:)

Sía

2007-01-17T15:16:00.000Z

Fór á frábært kósýkvöld hjá Ósk í gærkvöldi. Við hlógum svo mikið að okkur verkjaði í kjálkum og mögum hehe;) Að venju var mikið úrval af gómsætum réttum og borðuðum við á okkur gat. Tvær bleikubeib tilkynntu okkur að þær væru að fara að fjölga sér og koma litlubleikubeibin í heiminn 1. júlí og 1. ágúst, þá verður sko gaman:) Læt fylgja með myndir af veisluborðinu og flottasta réttinum, köku sem Hanna Guðný gerði svo listalega.

2007-01-12T16:07:00.000Z

Var að panta flug til Berlínar í byrjun febrúar:) Nú er bara að fara að skipuleggja ferðina og það allra mikilvægasta, ákveða hvað ég ætla að kaupa mér fallegt;) Það eru sko næstum tvö og hálft ár síðan ég fór síðast til útlanda og því segi ég bara H&M, Margrét og Robert here I come hehe;)

2006-12-30T19:52:00.000Z

Þá er komið að síðustu bloggfærslunni á þessu fyrsta bloggári mínu. Árið 2006 er búið að vera afbragðsgott og stútfullt af skóla, skemmtilegu fólki, djammi og fleiru og fleiru. Á því næsta verður ýmislegt brallað t.d. tekið á móti prófskírteini úr KHÍ, farið til útlanda og bara fullt annað skemmtilegt:)

Gleðilegt nýtt ár og takk fyrir það gamla;)
Ykkar Sía

2006-12-24T15:30:00.000Z

Gleðileg jól, hafið það sem allra best;)

2006-12-19T12:35:00.000Z

Í dag eru 5 dagar til jóla, 3 dagar þangað til Margrét kemur heim og 2 dagar þangað til Arna, Lára, Ósk og Edda koma heim, ég er orðin ótrúlega spennt:)

2006-12-18T11:24:00.000Z

Pælið í því aðeins 6 dagar til jóla. Ég er búin að gera lista yfir allt sem ég þarf að gera fyrir þann tíma og ætla að byrja á verkefnunum á honum núna.

Þangað til næst

2006-12-17T13:48:00.000Z

Til hamingju með daginn elsku Margrét:)

2006-12-15T11:36:00.000Z

Ég er komin í jólafrí!!! skilaði síðasta verkefninu á þessari önn á miðnætti á þriðjudaginn. Er búin að gera ýmislegt síðan þá. Ég fór að kenna á miðvikudagsm0rguninn og brunaði svo niður á Vegamót þar sem ég snæddi yndislegan mat með yndislegu bekkjarsystrum mínum:) Í gær fór ég svo á jólakaffi í Kastala sem er frístundaheimilið sem Guðjón er á, ég var ekkert smá fegin að mamma, pabbi og Hafdís voru með mér því ég átti í fullu fangi með að passa að Guðmundur styngi ekki af hehe:) Guðjón gaf mér síðan æðislegan snjókarl sem hann föndraði í skólanum og er ég búin að hengja hann upp á hurðina mína, yndisleg þessi börn:)

2006-12-08T17:24:00.000Z

Hló svo mikið í dag þegar við vorum að keyra niður Laugarveginn að ég grét bókstaflega úr hlátri. Ástæðan: prósentumerkið var vitlaust skrifað í búðarglugga. Hversu ruglaður er maður orðinn, ég skil ekkert í mér;)

2006-12-05T19:05:00.000Z

Fór á Rock Star tónleikana á fimmtudaginn með Hafdísi Lilju, Mörtu og Þórunni. Það var svooo gaman, ég skemmti mér konunglega. Þetta voru skemmtilegustu tónleikar sem ég hef farið á held ég bara:) Hápunktur kvöldsins var þegar Toby tók lagið sitt, oh oh oh oh oh;) Hér eru nokkrar myndir að vísu dáldið úr fókus enda margir á svæðinu.

p.s. þetta átti að fara á bloggið fyrr en það var eitthvað vesen með að setja inn myndirnar

2006-11-29T19:35:00.000Z

Nú er ég komin í mini jólafrí til 8. desember þegar ég fæ síðasta verkefnið á þessari önn:) Við vorum að skila safnmöppunni og vá hvað það er gott að hún er frá, svo sátum við nokkrar og gerðum næst síðasta verkefnið í skrift í hádeginu og síðasta verkefnið er bara hugleiðing um námskeiðið, að auki (eitt af uppáhaldsorðalaginu í safnmöppunni hehe) kláruðum við síðasta verkefnið í áföllum í nemendahópnum.

Ég var beðin um myndablogg og hér koma nokkrar myndir:)

Hér erum við Bjarney í bekkjarpartýi hjá henni í október

Birna og Bjarney í sing star

Edda við sömu iðju:)

2006-11-08T17:47:00.000Z

Þú veist að það er árið 2006 ef.....

1. Þú ferð í partý og byrjar að taka myndir fyrir bloggið þitt.

2. Þú hefur ekki spilað kapal með alvöru spilastokk í nokkur ár.

3. Ástæðan fyrir því að þú ert ekki í sambandi við suma vini þína er afþví þeir eru ekki að blogga, ekki á MySpace og eða á MinnSirkus .

4. Þú leitar frekar um alla íbúð af fjarstýringunni í stað þess að ýtabara á takkann á sjónvarpinu.

6. Kvöldstundir þínar snúast um að setjast niður fyrir framan tölvuna.

7. Þú lest þennan lista kinkandi kolli og brosandi.

8. Þú hugsar um hvað það er mikil vitleysa að lesa þennan lista.

9. Þú ert of upptekin/nn að taka eftir númer fimm.

10. Þú virkilega leist tilbaka til að athuga hvort þar væri númer fimm.

11. Svo hlærðu af heimsku þinni.

12. Sendu þetta á vini þína, settu þetta á bloggið þitt eða komdu þessu áframfæri einhverstaðar.
EF þú féllst fyrir þessu ... Aha ekkert svona! þú féllst fyrir þessu

2006-11-02T10:05:00.000Z

Ég er komin í vetrarfrí, jibbý:)

Ég er búin að vera að kenna síðustu 2 vikur og hefur gengið rosalega vel hingað til, krakkarnir eru svo miklar dúllur og þau elska að vera í skólanum og byrja að læra um leið og þau koma á morgnanna, gæti maður beðið um betri bekk, held ekki:) Við erum líka búnar að fá svo mikið af hugmyndum frá viðtökukennurunum okkar að maður þarf að fjárfesta í möppu hið snarasta og setja þær í hana.

Síðustu helgar hafa verið mjög skemmtilegar. Fyrsta vetrardag fór ég í fjölskyldupartý þar sem stórfjölskyldan hittist og djammaði saman. Það var svo gaman:) Síðastu helgi kíktum við nokkrar úr bekknum á alþjóðakvöld í skólanum og á laugardeginum var árshátíð Las chicas sem var alveg frábær. Svo má ekki gleyma kósýkvöldi hjá Sigríði Bjarney þar sem við borðuðum góðar kökur og rétti og kjöftuðum heilmikið;)

Held að ég sé búin að covera "allt" sem ég hef verið að gera frá síðustu færslu, þannig að núna ætla ég að halda áfram að vera í vetrarfríi:)

2006-10-16T14:36:00.001Z

Helgin var mjög svo skemmtileg. Á föstudaginn fórum við á Oktoberfest niður í skóla og í tjaldinu fyrir utan HÍ. Lára kom og kíkti á okkur og það var ekkert smá gaman að hitta hana, er búin að sakna hennar og hinna stelpnanna mikið. Á laugardaginn var afmælispartý hjá Mörtu og var stuð þar:) Gærdagurinn fór í leti og IKEA ferð:)

Í dag hófst svo vettvangsnámið og verð ég að kenna í Háteigsskóla næstu fimm vikurnar. Þetta legst bara ágætlega í mig, krakkarnir eru voða krútt og það var tekið vel á móti okkur. Í þessari viku verður áheyrn þar sem við erum að kynnast krökkunum og skólanum öllum. Það er svo bara að leggjast í hugmyndavinnu og plana geggjaðar fjórar vikur:)

2006-10-06T19:07:00.000Z

Linda vinkona á afmæli í dag, til hamingju með það:) Er því á leið í afmælisveislu núna á eftir.

Það er svo rosaplan um helgina. Strákarnir verða hjá okkur allan morgundaginn og svo verður mega bleikubeibapartý um kvöldið hjá Bjarney:) Í partýinu mun ég líklega leika gæs undir leikstjórn Birnu sem er að fara að gera stuttmynd haha, það verður skrautlegt ef það verður. Svo er spurning um að læra eitthvað smá hehe;)

úpps eins gott að fara í sturtu núna, afmælið byrjar eftir 50 mín.

Sían

2006-10-03T19:26:00.000Z

Þegar maður loksins fær smá pásu í skólanum, þá fær maður samviskubit yfir að vera ekki að læra. Djöfull getur maður verið klikkaður, kann ekki lengur að slappa af og njóta þess hehe;)

2006-09-29T17:22:00.000Z

Góða helgi gott fólk;)

Pæling:)

2006-09-21T19:00:00.000Z

Fór í gær í tíma til Önnu Sigurðar, algjör snilld:) Hver er með næsta miðvikudag?

Er annars að fara í kvennósaumó núna namminammi. Humm smá mótsögn í þessum tveimur málsgreinum, önnur snýst um brennslu en hin ja segjum að hún snúist ekki um það. Það er samt brennsla í því að hlægja hehe;)

Góða helgi gott fólk:)

ps. tókum myndavélina með eins og sést hehe

Helgin

2006-09-18T09:28:00.000Z

Það var ekkert smá gaman um helgina. Eftir að hafa kennt 1. bekk heilan dag brunuðum við niður í skóla og fórum á Laugarvatn. Það var ekkert smá gaman:) Það sem stóð upp úr var leikurinn Láttu bjórinn ganga (lesist með rödd þáttastjórnanda í amerískum leikjaþætti). Spilaðar voru allmargar umferðir og vann ég eina hehe;) Við fórum á ball á Lindinni þar sem stuðið var þvílíkt. Það var voða gott að koma heim og sofna eftir langan og skemmtilegan dag:)
Hér eru svo myndir frá kvöldinu þar á meðal eru myndir af nokkrum vinningshöfum kvöldsins;)

Daginn eftir heyrðist ekkert í mér. Ég missti röddina því við sungum svo svakalega mikið og hátt hehe;) Ég var ekki hætt að djamma, ónei því ég fór í innflutningspartý hjá bróður mínum og mágkonu á Eyrarbakka. Þetta var alveg frábært kvöld.

Í gær var svo lært og hvílt sig eftir æðislega helgi:)

Bjórkvöld

2006-09-13T18:04:00.000Z

Það er ekki margt sem hefur komist að heldur en skólinn og verkefni tengd honum, gaman að því. En í kvöld ætla ég á bjórkvöld útskriftarnema þar sem við ætlum að hrista hópinn saman og ræða um útskriftarferðina í maí og fjáraflanir. Ég er komin í þrjár fjáröflunarnefndir, bolasölu, bingókvöld og karnival og verður það án efa skemmtileg leið til að safna peningum fyrir sólarferð;)
Svo má ekki gleyma hinni árlegu Laugarvatnsferð sem verður á föstudaginn. Þrjú bleikubeib og vinir þeirra ætla ekki að missa af þessari frábæru ferð, spurning í hvaða búning við verðum;)
Það verður nóg um að vera um helgina því ég er líka að fara í innflutningspartý hjá bróður mínum og kærustunni hans á Eyrarbakka á laugardaginn, mín verður bara út á landi alla helgina hehe...

Hver man ekki eftir þessari ferð:)

2006-09-10T19:31:00.000Z

Ég stækkaði í dag um nokkra sentimetra því ég keypti mér stígvél. Já Flatbotna Sía keypti sér skó með hælum og ætlar sér að nota þá hversdagslega! Tók Margréti nefnilega til fyrirmyndar og ákvað að reyna að pæja mig upp. Er komin nokkuð langt með það, keypti mér pæjupeysu í búðinni hennar Siggu frænku fyrir vestan, er farin að naglalakka mig, er með tiltölulegar nýja klippingu og strípur (er líka með einn depil í toppnum en ég borgaði ekki fyrir hann), á gullskó sem ég er ótrúlega ánægð með eins og sumir hafa heyrt nokkrum sinnum. Heyrðu já var næstum búin að gleyma flotta bolnum sem ég keypti í dag sem verður notaður á djamminu. Ætli þetta séu kannski merki um að ég er að fullorðnast, spurning... Talandi um það ég sá draumaíbúðina mína á netinu í gær og ég hef varla hætt að hugsa um hana. Á einhver nokkrar millur til að lána mér? Þetta er ótrúlega kósý, lítil risíbúð við Laugardalinn. Vá hvað mig langar að kaupa hana.

Hæ hæ

2006-09-07T15:06:00.000Z

Sælt veri fólkið
Ég veit ég hef ekki verið eins dugleg og ég ætlaði en ég lofa að bæta úr því:) Núna er skólinn byrjaður af alvöru með verkefnum og öllu tilheyrandi jibbý. Svo er ég orðin forfallakennari jebb mín var að kenna 6 ára í dag og það gekk bara mjög vel, gullskórnir mínir vöktu mikla lukku:) Þau voru voða góð en þó eru nokkrir fjörkálfar sem þurftu aðeins að sýna sig hehe:)
Er síðan að fara að vinna á foreldrakvöldi í Draumalandi í kvöld og svo fer ég að hitta stelpurnar á kjörsviðinu mínu og við ætlum að borða og drekka og kjafta að sjálfsögðu, hlakka til:)

þangað til næst,
forfallakennarinn:)

Bloggsnillingur

2006-08-27T20:12:00.000Z

Ég er algjör snillingur þegar viðkemur bloggi hehe;) Eins og glöggir lesendur tóku eftir fór síðan í fokk um helgina. Allt draslið sem sér um uppsetningu og slíkt datt út þegar ég reyndi að bæta blogginu hjá Madridarförunum inn. En ég náði að redda þessu að lokum vúhúúú með þvílíkum brögðum. Þannig að það er ljóst að ég er bloggsnillingur, komið bara til mín ef þið þurfið aðstoð hehe nei djók:)

Ef einhver þarna úti er meiri snillingur en ég og kann að gera headerinn flottan og bæta við myndum þá má sá hinn sami hafa samband:)

Hef þetta í styttri montkantinum í dag, heyrumst seinna
Sían

I'm baaack:)

2006-08-23T18:55:00.000Z

Þá er ég mætt á bloggið aftur eftir sumarfrí vegna tuga áskorana hehe:)

Nú er skólinn byrjaður aftur og ég er komin á 3. ár jibbý. Ég er að bisast við að velja mér skóla fyrir vettvangsnámið en það gengur ekki alveg nógu hratt, ég þekki ekkert til kennaranna í 6 ára bekk í skólunum sem ég hef mestan áhuga á, en þetta hlýtur að reddast.

Guðjón minn byrjaði í 1. bekk í dag og þegar ég spurði hann hvað hann hefði gert þá sagði "bara allt" :)

Það sem er skrítnast við að byrja í skólanum er að það vantar næstum helminginn af bleiku beibunum. Arna og Lára eru farnar til Madrid og Ósk og Eyrún fara eftir 2 vikur, Edda er á Kanaríeyjum og Hugborg er á Ítalíu. Ekki nóg með það þá fór Margrét til Berlín og verður þar í vetur. Eins gott að við hinar sem erum eftir á landinu verðum duglegar að djamma og gera eitthvað skemmtilegt saman.

Læt fylgja nokkrar hressar myndir frá Klofa 2006:)

Fótboltaliðin knáu

Vinna

2006-05-26T18:33:00.000Z

Jæja stúlkur mínar þá kemur blogg frá mér:)
Ég er búin að vera að vinna svolítið auka þessa vikuna og svo byrja ég á fullu í næstu viku þegar ég fer á fræðslur og fleira skemmtó. Námskeiðin fyrir krakkana byrja svo daginn fyrir afmælið mitt og það vita allir hvenær það er;) Svo verður mín yfirmaður í nokkrar vikur í júní og verð ég þá voða fín með mig í dragt og alles, hehe nei djók bara gamla ég plús meira álag hehe. Í júlí verður frekar tjillað í vinnunni þar sem ég og einn strákur verðum með frístundaklúbb fyrir 10-12 ára krakka og það er allt annað mál en að vera með 6 ára krúsídúllurnar sem geta verið ansi fjörug á tímum;)
Á morgun verð ég í undirkjörstjórn í Ölduselsskóla allan daginn og kvöldið þannig að ég verð hressust annað kvöld en er samt að pæla að gera kannski eitthvað, ég meina þetta er nú einu sinni kosningakvöld:)
Afmælispartýið mitt verður síðan haldið að öllum líkindum 9. júní en ég læt ykkur vita betur af því líklega bara í næstu viku.
Óska síðan Ásdísi Svövu aftur til hamingju með 2. sætið í ungfrú Ísland:)

Þangað til næst, Sían:)

Eurovision 2006

2006-05-18T13:50:00.000Z

Áfram Ísland

Sumarfrí;)

2006-05-12T21:16:00.000Z

Hæ hæ

Þá eru prófin búin, kláraði á mánudaginn og skilaði síðan möppum í myndmenntinni í gær, vá hvað það var geggjað. Var orðin svo þreytt í gær að ég fór nánast beint upp í rúm og lagði mig, það var eins og öll þreyta síðustu mánaða hafi komið í einu.
Við stelpurnar á kjörsviðinu fórum saman í baðstofuna í Laugum á mánudaginn eftir próf, það var æði, fórum í gufu, pottana inni og úti og svo fórum við í hvíldarherbergið ekkert smá gott;) Tókum svo einn laugara og borðuðum bragðaref, nammnamm.

Ég er í fríi núna nema á eftir hádegi á þriðjudögum næstu 3 vikurnar:) Svo hafið bara samband ef ykkur langar að gera eitthvað skemmtó.

Á morgun verður hittingur hjá Lindu á Kambó og það verður án efa skemmtilegt enda fyrsta djammið eftir próf. Eurovision og próflokadjamm er svo næstu helgi.

Sjáumst á djamminu;)

Lestrarerfiðleikar og ritun

2006-04-30T03:18:00.000Z

Hæ
Long time no see:)

Ég er búin að vera svo bissý að læra upp á síðkastið enda prófin alveg að byrja. Ég fer í tvö próf 4. og 8. maí og svo er skil á möppum í Grafík, málun og teiknun 10. maí þannig að ég er búin snemma þetta árið;) 11. maí er síðan sýning í listgreinahúsinu í skólanum og verður undirrituð með eitt stykki málverk og eitthvað annað með þannig að allir að kíkja á meistaraverkin hehe.

Ég er búin að gegnsósa hausinn af lestrarerfiðleikum og ritun í dag, spurning hvað helst inni, en í tilefni að því að ég er í þessum töluðu orðum að klára viðfangsefnið ritun ákvað ég að henda inn nokkrum línum á bloggið því það er svo gott fyrir alla að skrifa því það þjálfar blablabla æj þið skiljið hvernig það er að vera í prófalestri maður er ansi steiktur haha;)

Hitti svo Margréti og Lindu áðan í Stórholtinu, það er ekkert smá nauðsynlegt að kíkja aðeins upp úr bókunum og hitta vini sína, takk fyrir það stelpur og til hamingju með að vera búin að skila og vera á leiðinni að skila lokaverkefnum:)

Bæjó fólk,
Sían:)

Sumardagurinn fyrsti

2006-04-20T18:59:00.000Z

Gleðilegt sumar;) Við Guðjón fórum í útsýnisflug í dag, það var alveg æði:)

Er að fara að borða fyrsta grillmatinn þetta sumarið nammi namm:)

RPM og flugferð

2006-04-19T17:30:00.000Z

Hæ
Ég er búin að sitja á rassinum í allan dag heima hjá Örnu að gera læsisverkefni og ég er hætt í bili og ætla að snúa mér að einhverju öðru fagi:)

Linda byrjaði að kenna aftur í gær í Baðhúsinu og ég fór að sjálfsögðu, reyndar í fyrsta skipti í nokkuð langan tíma hehe:) Það var ansi mikið púl en við kláruðum þetta, erum svo góðar;) Skelltum okkur síðan í pottinn og gufu, mjöööög gott:)

Er að fara í útsýnisflug á morgun sumardaginn fyrsta með Guðjóni sem hefur aldrei farið í flugvél áður, hlakka til að sjá hvernig honum líkar það:)

Adios Sía

Páskaegg nammi nammi namm;)

2006-04-16T15:04:00.000Z

Gleðilega páska allir saman:) Hafið það gott:)

Skírdagur

2006-04-13T14:07:00.000Z

Það var svo gaman í gær. Við mættum til Ásdísar þar sem við borðuðum mini-pizzur, nachos með salsadippi, osta og nammi. Allir voru vel hressir og voru sungin ófá lögin þetta kvöld hehe. Skelltum okkur svo í bæinn þar sem við gerðum allt vitlaust;) Er búin að setja inn myndir á myndasíðuna mína og svo eru miklu fleiri myndir á þessari síðu, síðunni hennar Hönnu Guðnýjar. Takk fyrir kvöldið girls, við erum lang besti bekkurinn:)

Ég er svo að fara í saumaklúbb til Auðar á eftir þar sem nýju mömmsurnar ætla að koma með ungana sína:) Hlakka til

Let's get the party started:)

2006-04-12T11:45:00.000Z

Hæ

Ég er svo ánægð með afrakstur minn þennan morguninn, er komin með rúma eina og hálfa blaðsíðu í Læsisverkefnið:) Ég er hætt að læra í dag því ég er að fara að vinna núna á eftir, er að fara að leika mér einhvers staðar í Vesturbænum með krökkunum mínum. Svo er aðalmálið partýið í kvöld, hlakka svoooo mikið til. Ásdís bleikabeib ætlar að halda það fyrir öll hin bleikubeibin og það verður fjör. Í þetta sinn verður myndavélin við hönd og ef ég verð spræk á morgun þá hendi ég myndum inn á myndasíðuna mína;)

Hafið það sem allra best í dag sem og alltaf:)

Ykkar Sía:)

Vantar smá spark í rassgatið

2006-04-09T15:21:00.000Z

Fór á bjórkvöld í Kennó í gær og ég veit ekki alveg hvað hefur komið fyrir alla nemendurna, eru allir orðnir svona samviskusamir að þeir eru að læra alla daga og öll kvöld. Það voru sem sagt mjöööög fáir og þetta er í annað sinn sem ég fer á bjórkvöld þar sem það eru svona fáir. Eins gott að Anna Pála og Þórunn voru með mér:) Þrátt fyrir fámennið var mjög fínt og gott að komast aðeins út. Ég tók ekki með myndavél en það er ein mjög fyndin mynd á skhi.is, kíkið á hana;)

Ég er að reyna að vera rosa dugleg að læra en það gengur ekki rass í bala, vantar smá stress því ég er bara að hanga þó svo ég sé að fara í lokapróf á morgun, gæti ekki verið kærulausari;) Ég reyni bara að vera duglegri á morgun.

Þarf núna að fara að klæða mig fyrir ferminguna sem byrjar klukkan 5, þau hérna heima að ég sé svo lengi, skil það ekki.

Bæjó

Laugardagskvöld með ... var það Hemmi Gunn

2006-04-08T19:37:00.000Z

Sælt veri fólkið

Það er laugardagskvöld og ég ætla að slá þessu upp í kæruleysi og fara í partý í Kennó, að vísu á bíl. Það verður líka svaka partý hjá bleiku beibunum á miðvikudaginn þannig að ég ætla að spara mig. Er að spá í að taka með mér myndavél þannig að það getur bara vel verið að ég skelli inn nokkrum myndum á morgun:)

Hafið það gott í kvöld
ykkar Sía:)

Numero dos

2006-04-07T22:25:00.000Z

Fékk ábendingu frá einu bleiku beibi að henni líkaði ekki fyrri myndin enda var hún ekki á henni þannig að ég ætla að skella einni gamalli upp á svið.

Annars er mín að reyna að vera voða dugleg að læra fyrir lokapróf í orðhluta- og hljóðkerfisfræði. Það er að takast þar sem ég er búin með það sem var á planinu fyrir daginn í dag en mér finnst oft gott að vera á undan þannig að ég ætla að lesa meira í kvöld þá er líka minna að gera á morgun;) Ef einhvern vantar að vita eitthvað um nafnorð og sagnorð þá vitið þið hvar mig er að finna:)

Chao Sía:)

Flottu bleiku beibin

2006-04-06T12:45:00.000Z

HÆ HÓ

Langaði að setja inn mynd af hinum frábæru bleiku beibum. Þessi mynd var tekin á árshátíðinni upp á hótelherberginu okkar;)

Hver er ég?

2006-04-05T11:31:00.000Z

Halló fólk

Á maður ekki að byrja á því að kynna sig? Ég heiti Sigríður Erna og er 23 ára Reykjavíkurmær. Ég er í Kennaraháskóla Íslands á 2. ári á grunnskólabraut. Nenni ekki að segja meira, ég meina þekkiði mig ekki annars? :)

Það er allt á fullu núna í skólanum og ætti ég að vera að læra í augnablikinu en það er nú bara svoleiðis að þá er alltaf hægt að finna sér eitthvað annað að gera. Það er bara rúmur mánuður eftir af skólanum úfff á eftir að gera svo mikið þangað til, en verður maður ekki að nota vel þekktan íslenskan frasa og segja: Þetta reddast;)

Núna ætla ég að renna yfir eina stórskemmtilega grein áður en stelpurnar ná í mig til að fara og fá okkur eitthvað gott í hádegismat.

Au revoir, Sían:)

prufa einn, tveir, þrír

2006-04-02T17:09:00.000Z

Hæ hæ

Ef þetta kemst á netið þýðir það bara eitt, þetta virkar og það sem meira er ég kann á það, yesss:)

ykkar Sía